Techie IT
आईतबार, मंसीर २१,२०७७

मन्त्रीले गराए बालविवाह


लहान, १४ वैशाख । बालविवाह अपराध हो ।समाजमा अपराध न्यूनीकरण गर्न सरकारले करोडौँ खर्च गर्दै आएको छ । तर, प्रदेश २ को सरकारका उद्योग पर्यटन, वन तथा वातावरण राज्यमन्त्री सुरेश मण्डलले सम्पूर्ण खर्च दिएर १४ वर्षीया बालिकालाई तड्कभड्का साथ विवाह गराइदिएका छन् ।

कानूनको पालना गराउने राज्यमन्त्री मण्डलले २०६२ वैशाख १० गते जन्मिएकी कल्याणपुर ३ पर्साहीकी राधा मल्लिकलाई २०७६ वैशाख ११ गते लाखौँ खर्च गरेर विवाह गराइदिएका छन् ।

 

राज्यमन्त्री मण्डलले कुशे डोमका छोरी राधालाई शिक्षाको लागि लगानी नदिएर कलिलै उमेरमा विवाह गराएर कानूनी राज्यलाई धज्जी उडाएका छन् ।

राज्यमन्त्री मण्डलले कन्यादान समेत गरेर शिक्षाबाट मल्लिकलाई बञ्चित गराएका छन् । राधा स्थानीय पर्साही माविमा कक्षा २ मा पढ्दै गर्दा २०७२ मा विद्यालय जान छाडेकी थिइन् ।

राज्यमन्त्री मण्डलले दहेजको समेत प्रोत्साहन गरी सुन दान, भोजभतेर गरी तडकभडकका साथ सो विवाह गराएका थिए ।

राज्यमन्त्री मण्डलले बिहे भएको राति शिक्षाबाट बञ्चित पारिएकी राधालाई अर्शीवाद दिएर बिहान बिदाइ गरेका छन् । राज्यमन्त्री मण्डलले शिक्षामा जोड नदिई कलिलो उमेर विवाह गराएर दलित समाजलाई जिस्कियाइएको मानव अधिकारकर्मी राजकुमार राउतको आरोप छ ।

जिल्ला प्रशासन कार्यालय सिरहाका एसपी जीवन श्रेष्ठले बालविवाह अपराध भएको बताएका छन् ।

‘मिडियामा आएको घटनावारे हामी अनुसन्धानमा लागेका छौँ । उजुरी आए तीब्र अनुसन्धानमा लाग्ने छौँ’, एसपी श्रेष्ठले भनेका छन्, ‘कानून सबैको लागि बराबर हो ।’

 


क्याटेगोरी : विशेष
ट्याग : #बालविवाह


तपाईको कमेन्ट लेख्नुहोस्


Kathmandu
24°
Mostly Cloudy
05:1419:03 +0545