तालिममा गोली चलाउँदा प्रहरी घाइते

साझा पाना २०७५ मंसीर १८ गते १०:३६ मा प्रकाशित

मुना थापा

विराटनगरको रानीस्थित पूर्व क्षेत्रीय प्रहरी तालिम केन्द्रमा मंगलबार दिउँसो तालिमका क्रममा गोली लागेर एक प्रहरी जवान घाइते भएका छन् । पेस्तोलको गोली लागेर प्रहरी जवान सिरहा घर भएका २७ वर्षीय राजेन्द्र यादव घाइते भएका हुन् ।

तालिम केन्द्रका प्रमुख प्रहरी बरिष्ठ उपरीक्षक ९एसएसपी० शहकुलबहादुर थापाका अनुसार घाइते यादवको देव्रे हातको हत्केला छेडेर गोली पार भएको छ । प्रशिक्षार्थी प्रहरीहरुलाई तालिममा गोली हान्न सिकाउने क्रममा दिउँसो २ बजे घटना भएको एसएसपी थापाले जानकारी दिए । ‘प्रशिक्षार्थीहरुलाई फायरिङ गराउने क्रममा अचानक पेस्तोलमै गोली अड्किन पुग्यो,’ उनले भने, ‘त्यही पेस्तोल सफा गरेर बाहिर निकाल्न लाग्दा गोली पड्किएर प्रहरी जवानको हत्केलाबाट पार भयो ।

थापाका अनुसार पेस्तोलका पार्टपूर्जा नै बाहिर निस्किएका थिए । घटनापछि घाइतेलाई उपचारका लागि अस्पताल लगिएको थियो । अहिले स्वास्थ्य अवस्था समान्य रहेको बताइएको छ । घाइतेलाई विराटनगरको गोल्डेन अस्पतालमा भर्ना गरिएको थियो । अहिले थप उपचारका लागि काठमाडौं लगिएको छ ।

क्याटेगोरी : समाचार
ट्याग : #प्रहरी घाइते