Techie IT
बिहीबार, मंसीर ११,२०७७

गृहसचिव प्रेमकुमार राईद्वारा नेपाल प्रहरी अस्पतालनिरीक्षण


काठमाडौं, २९ साउन

गृहसचिव प्रेमकुमार राईले नेपाल प्रहरी अस्पताल महाराजगंजको मंगलबार निरीक्षण तथा अवलोकन भ्रमण गर्नुभएको छ । सो अवसरमा उहाँले अस्पतालको नयाँ तथा पुरानो वार्ड भवन, ओपिडी, पुस्तकालय, प्याथोलोजी लगायतको निरीक्षण गर्नुभयो ।

भ्रमणको क्रममा अस्पतालमा कार्यरत प्रहरी अधिकृत तथा जवानहरुलाई सम्बोधन गर्दै गृहसचिव राईले प्रहरी अस्पतालले अन्य अस्पताल सरह उत्कृष्ट स्वास्थ्य सेवासुविधा प्रदान गरेको चर्चा गर्दै प्रहरी अस्पताललाई मेडिकल कलेज बनाउनका लागि आवश्यक पहल गर्ने बताउनुभयो । सेवाग्राहीलाई समानरुपमा गुणस्तरीय सेवा प्रदान गर्नुपर्ने उल्लेख गर्दै उहाँले अस्पतालबाट प्रदान गरिने स्वास्थ्य सुविधा बृद्धि गर्दै लैजानु पर्नेमा जोड दिनुभयो ।

अस्पतालमा कार्यरत प्राविधिक जनशक्तिलाई अझै दक्ष बनाउने र वृत्तिविकासमा ध्यान दिई प्रोत्साहित गर्नुपर्नेमा जोड दिँदै गृहसचिव राईले यसका लागि स्वास्थ्य मन्त्रालयसँग आवश्यक समन्वय गरिने बताउनुभयो ।

सो अवसरमा प्रहरी महानिरीक्षक सर्वेन्द्र खनालले निरीक्षण भ्रमणबाट प्रहरी कर्मचारीहरुमा थप उत्साह तथा जागरुकता थपिएको चर्चा गर्दै प्राप्त निर्देशन तथा सुझावहरु अक्षरस पालना गरिने प्रतिबद्धता व्यक्त गर्नुभयो । प्रहरी अस्पताललाई नमूना अस्पतालको रुपमा विकास गर्न अझै उत्कृष्ट र बिरामीमैत्री सुविधा सेवा प्रदान र वातावरण उपलब्ध गर्नुपर्नेमा उहाँले जोड दिनुभयो ।

उक्त अवसरमा स्वागत मन्तव्य व्यक्त गर्दै अस्पतालका मेडिकल डाइरेक्टर प्रहरी अतिरिक्त महानिरीक्षक डा.दिनेशचन्द्र पोखरेलले विविध समस्याका बाबजुद अस्पतालको सेवालाई थप प्रभावकारी बनाउन भौतिक पूर्वाधार, अस्पताल व्यवस्थापन, बिरामीलाई गर्ने व्यवहार, औषधी वितरण लगायतका विषयमा सकारात्मक परिवर्तन गर्दै आएको बताउनुभयो ।

अस्पतालका डिपुटी मेडिकल डाइरेक्टर प्रहरी नायव महानिरीक्षक डा.दुर्गा थापाले अस्पतालको काम कारवाही तथा हालको गतिविधिबारे प्रस्तुतिकरण गर्नुभएको उक्त कार्यक्रममा अस्पतालमा कार्यरत प्रहरी नायव महानिरीक्षकहरू, प्रहरी वरिष्ठ उपरीक्षकहरू लगायतका प्रहरी अधिकृत तथा जवानहरुको उपस्थिति रहेको थियो ।


क्याटेगोरी : समाचार
ट्याग : #नेपाल प्रहरी


तपाईको कमेन्ट लेख्नुहोस्


Kathmandu
24°
Mostly Cloudy
05:1419:03 +0545