Techie IT
मंगलबार, कात्तिक २,२०७८

ग्लोबल गोरखा समाजद्धारा ११ लाख ७८ हजार रुपैयाँ बरावरको स्वास्थ्य सामग्री सहयोग


ग्लोबल गोरखा समाजले ११ लाख ७८ हजार रुपैयाँ बरावरको स्वास्थ्य सामग्री सहयोग गरेको छ ।

बुधवार गोरखा सदरमुकाममा आयोजित एक कार्यक्रमका बिच संस्थाका नेपाल संयोजक बिनोद पोखरेलले उक्त सामग्री जिल्ला समन्वय समितिका प्रमुख अशोक कुमार गुरुङ मार्फत हस्तान्तरण गरेका हुन् ।
११ वटा स्थानीय तह हरेकलाई १३ हजार थान सर्जिकल मास्क र ३० थान थर्मल गन प्रदान गरिएको उनले बताए ।

जिल्ला प्रशासन कार्यालय र सुरक्षा निकायका लागि प्रमुख जिल्ला अधिकारी तिर्थराज भट्टराई मार्फत सात हजार थान मास्क, १० थान थर्मल गन, जिल्ला समन्वय समितिका लागि दुई हजार थान मास्क र दुई थान थर्मल गन, पत्रकार महासंघ गोरखका लागि दुई हजार थान मास्क र एक थान थर्मल गन सहयोग प्रदान गरिएको छ ।

समन्वय समितिका प्रमुख मार्फत तत्कालै गाउँपालिकाका प्रमुख, उपप्रमुख र वडा अध्यक्षलाई स्वास्थ्य सामग्री जिम्मा लगाइएको थियो ।
कोरोना भाईरसको संक्रमण बढ्दो क्रममा रहेको, संक्रमित थपिँदो भएकाले स्थानीय तहलाई काम गर्न सहज होस भन्ने धेयले स्वास्थ्य सामग्री सहयोग गरिएको उनले बताए ।

‘सुरक्षाकर्मी, जिल्ला प्रशासन र पत्रकारहरु सर्वसाधारण सँग नजिक सम्पर्कमा रहने भएकाले सुरक्षित रहन स्वास्थ्य सामग्री दिएका छौँ’ संयोजक पोखरेलले भने । उपयोगी स्वास्थ्य सामग्री रहेको भन्दै स्थानीय तहका प्रमुख उपप्रमुखले सहयोगको प्रशंसा गरेका छन् ।

ग्लोबल गोरखा समाजको नयाँ कार्यसमितिका सदस्यहरु आफैँले उक्त रकम संकलन गरेर सहयोग जुटाएका हुन् । उक्त संस्थाले यस अघि पनि सामाजिक काममा सहयोग गर्दै आएको छ ।


क्याटेगोरी : समाचार
ट्याग : #ग्लोबल गोरखा समाज


तपाईको कमेन्ट लेख्नुहोस्